BACOLOD CITY – Nagdangat na sa 565 ang kaso sang dengue sa Bacolod, humalin Enero 1 tubtob Agosto sini nga tuig, suno sa datus sang City Health Office.
Naga-edad isa ka bulan asta 86 anyos ang mga biktima sang dengue.
Sa interview sang Radyo Bandera kay Punong Barangay Rodolfo “Boy” Pico, iya gin pahayag nga padayon man ang clean-up drive kag declogging operation sa tanan nga lugar sa Mansilingan apang naga saka sa gihapon ang kaso.
Hingyo ni Kap Pico sa pumuluyo sang iya barangay nga mag ugyon sa kampanya kontra sa dengue para madasig ini nga mapunggan sa pagsaka pinaagi sa pag paninlo sang palibot nga isa man sa gina patuman ka Department of Health (DOH) nga Search & Destroy, Wear Self Protection, Seek Early Consultation kag Support Fogging & Spraying.
Sang tinalikdan nga regular session sang Sangguniang Panlungsod Bacolod, nagduso man si Councilor Kalaw Puentevella sang pag clean-up drive kag declogging sa mga drainage system kag eskwelahan antis sang pagbukas sang klase para malayo ang mga kabataan sa dengue.*/Red Salgado
