PHILIPPINES – Pabor ang anay National Task Force Against COVID-19 special adviser nga si Dr. Ted Herbosa nga i-upod sa “definition” ukon depinasyon sang “fully vaccinated” ang pagpabakuna sang una nga booster shot.
Ginsiling ni Herbosa nga madamo nga bakuna ang naga kinahanglan sang tatlo ka-doses, kalakip na ang mga bakuna para sa polio, hepatitis kag MMR (measles, mumps kag rubella).
Kun mabag-o ang depinasyon sang ‘fully vaccinated individual’, mas madamo ang maganyat nga magpaturok sang booster shot kag indi na mag hulat pa sang pag paguwa sang ginatawag nga ‘new generation vaccines’ nga ginhimo batuk Omicron subvariants.
Samtang wala pa ginpaguwa ang nasambit nga sahi sang bakuna, ginahingyo ang publiko nga magpabakuna na sang available nga bakuna nga magahatag man sang proteksyon batuk sa bag-o nga variants sang COVID-19.
Sandig sa datus sang Department of Health (DOH), yara sa 72 million nga indibidwal ang ‘fully vaccinated’ sa pungsod sang Agosto 11 apang yara sa 16.8 million pa lamang ang nakakuha sang una nga booster dose kag 1.7 million naman ang nakakuha sang ika-duha nga booster shot.
“This is the reason why I fully support the proposal to make the definition of fully vaccinated as three doses so that many people will be given protection especially now that students are set to go back in school this August,” suno kay Herbosa.
