Ginsumiter ni Sen. Grace Poe ang Senate Bill 2445 nga tuyo suspendihon ang koleksyon sang excise taxes sa gasolina kag diesel kung malab-ot ang average price sang Dubai crude oil sa $80 kada bariles sa sulod sang tatlo ka magkasunod nga bulan.
Kung mapatuman ini, maganubo gilayon sang P10 ang presyo kada litro sang gasoline kag P6 sa kada litro sang diesel.
“Tiyak na magkakaroon ng epekto ang pagtaas ng presyo ng petrolyo sa halaga ng ilang mga produkto, lalo na sa pagkain na siyang pinakamalaking pinagkakagastusan ng isang pamilya. Lalo lamang nitong palalalain ang kahirapan at gutom ng ating mga kababayan. Kung hindi kayang magbigay ng pamahalaan ng sapat na ayuda sa mga mamamayan, magawa man lang nitong ibsan ang kanilang kalbaryo,” pahayag ni Poe.
Sa report sang Philippine Statistics Authority sadtong nakaligad nga semana, nga apisar nagnubo ang food inflation sa 5.3 porsyento sadtong Oktubre, nagtaas naman ang fuel inflation sang 32.9 porsyento halin sa 21.3 porsyento sadtong Setyembre nga isa sa pinakamataas nga nareport karon nga tuig.
Sa idalom sang proposal ni Poe, ginaduso sini ang pag-amyenda sa section 148 sang National Internal Revenue Code sa pagsuspender sa excise taxes sa mga regular nga gasolina, unleaded premium gasoline kag diesel.
Nakasaad sa Tax Reform for Acceleration and Inclusion (TRAIN) law nga ginapahanugutan ang suspensyon sang nakaiskedyul nga pagtaas sang excise tax sa petrolyo kung magtaas ang tatlo ka bulan nga average sang Dubai crude oil prices nga base sa Mean of Platts Singapore sa $80 kada bariles ukon masobra pa.
Apang ang suspension ang para lang sa tuig 2018 tubtob 2020.
Nalakip man sa TRAIN law nga kinahanglan sang Department of Finance (DOF) nga magpatigayon sang tuigan nga pagtuon sa implementasyon sang excise tax sa petrolyo base sa rekomendasyon sang Development Budget Coordination Committee apang kinahanglan man nga ang suspensyon ang indi magresulta sa pagkaltas sa excise tax nga ginapatuman sa nasambit nga panahon.
Suno sa DOF, posible madulaan ang gobyerno sang P131 bilyon sa suspensyon sang excise tax sa gasolina kag diesel.
Ginaduso sang administrasyon ang pagpanubo sa income taxes sang mga kumpanya sa idalom sang CREATE law, kung sa diin, ginabulubanta ang madula nga kita ang magalab-ot sa P251 bilyon sa una nga duwa ka tuig.
