CADUHA-AN, CADIZ CITY– Patay ang isa samtang pilason naman ang duha matapos magluntad ang rambol sa kapistahan sa Barangay Caduha-an, Cadiz City.
Nagluntad ang kinagamo sa covered court sang barangay, pasado las-3:00 sang kaagahon, Martes, Mayo 2, 2023.
Sandig sa impormasyon nagikan sa Cadiz City Police station, yara sa baylihan ang mag-utod nga Jupeth Teruel, 22-anyos kag Romart Teruel, 24-anyos, lunsay mga residente sang Hacienda Bernardita, sa nasambit nga barangay.
Sa pagluntad sang komosyon, nabun-an si Jupeth apang naka-angkon naman sang pilas si Romart.
Dugang pa, naka-angkon man sang pilas ang isa pa gid ka persona nga ginkilala kay Jeric Cañete, 26-anyos.
Si Jupeth ang naka-angkon sang patal nga pilas tuga sang pagbuno kag ginbawi-an ini sang kabuhi.
Sa subong nagapadayon pa ang imbestigasyon sang kapulisan may angut sa insidente.*
