Tungod sa “kwarta” kon ngaa gin-alegar nga gin-massacre ni Christian “Don Don” Tulot ang apat ka magkapamilya sa Gardenville Subdivision sa Barangay Tangub, ciudad sang Bacolod.
Nahibaluan man nga sang Hunyo 28, 2020, nagparecord ang duha sa mga biktima nga sanday Jocelyn Espinosa Hombre kag John Michael Espino sa Station 8 batuk kay Tulot sa iya sini pagpamahog nga pamatyon sila, samtang yara ini sa impluwensya sang makahulubog nga ilimnon, sandig sa blotter report nga nakuha sang Radyo Bandera Bacolod.
Sa pag-ako ni Tulot sang iya ginhimo nga krimen, ginakabig na karon sang mga kapulisan ang Tangub Massacre bilang “case closed.”
Magapangatubang naman sang kaso nga illegal possession of drugs kag multiple murder with robbery si Tulot.
Nakuha sa balay nga ginatiniran ni Tulot sa Don Salvador Benedicto, Negros Occidental ang anum kabilog nga cellular phone, box nga may mag pulseras kag iban pa nga gamit sang mga biktima, suno kay Maj. Joery Puerto, hepe sang Station 8.
Gin-ako ni Tulot sa mga kapulisan sini nga hapon, Abril 8, nga wala sang kahilabtanan si Joel Espinosa kag si a certain “Bro,” nga una niya gin-implicate sa krimen.
Nagkadto ang mga pulis sa crime scene kag gintudlo mismo ni Tulot kon diin gintago ang mga weapon nga gingamit sa krimen.*
