Pilason ang isa ka lalaki matapos ini ginlabo sang iya upod sa inom sa Sitio Manlama, Barangay Montilla, banwa sang Moises Padilla, Negros Occidental takna las 9 sang gab-i, Domingo, Pebrero 5, 2023.
Ginkilala ang biktima kay Ronilo Betongga, 43-anyos, kasado, isa ka laborer samtang ang suspek amo si Joebert Pineda, 40-anyos, isa ka mangunguma kag lunsay mga residente sang nasambit nga barangay.
Suno sa inisyal nga imbestigasyon, naga-inom sang makahulubog nga ilimnon ang biktima kag suspek sang nagluntad ang mainit nga paglalisanay sa tunga sang duha.
Nangakig ang suspek tubtob nga ginlabo niya ang biktima gamit ang 18 ka pulgada nga binangon.
Gilayon naman nga gindala ang biktima sa Moises Padilla Health Infirmary bangud sa naangkon sini nga mga kapilasan sa lawas kag sa karon, gin-saylo ini sa Isabela District Hospital.
Nagpatigayon naman sang hot pursuit operation ang mga kapulisan batuk sa suspek tigayon nga madakpan ini.
Sa karon, yara na sa kustodiya sang Moises Padilla Municipal Police Station ang suspek para sa nagakaigo nga disposisyon.*
