Warning: graphic content
PULUPANDAN – Pilason ang isa ka lalaki matapos ginbuno sang nag-utang sa iya nga suspetsado sa Brgy. Culo sa banwa sang Pulupandan takna las dyis y media sang gab-i sang Domingo, Marso 19.
Ginkilala ang biktima nga si Junjun Bacong, 33-anyos nga residente sang nasambit nga lugar kag gin-utangan sang suspek.
Samtang ang suspek naman ang ginkilala kay JR De Guzman, 24-anyos nga residente naman sang Brgy. Payao sa banwa sang Binalbagan.
Suno kay Police Captain Emman Anacleto, officer-in-charge sang Pulupandan Municipal Police Station, nahibaluan nga may utang ang suspek sa biktima nga P500.
Domingo sang aga, may nagluntad na nga komosyon matapos ginsukot sang biktima ang suspek.
Apang pagkagab-i, samtang upod nga naga-inom sang makahulubog nga ilimnon, nanukot liwat ang biktima.
Naglakat naman ang suspek kag nagkuha sang sundang.
Sang magbalik ang suspek, ginhakos sini ang biktima kag ginbuno sa likod sang makapulo ka beses.
Ginhingagaw dala ang biktima sa Corazon Locsin Montelibano Memorial Regional Hospital kag natalana ini nga ipaidalum sa operasyon.
Samtang padayon naman ang hot pursuit operation sang kapulisan agud madakpan ang nakapalagyo nga suspek.
