Bangud sa komprontasyon kag wala pag-intyindihanay, ginlabo sang isa ka lalaki ang iya man lang nga abyan sa banwa sang Hinobaan, Negros Occidental, takna las-7 sang gab-i, Hunyo 15.
Base sa imbestigasyon sang mga kapulisan, nagikan sa ilimnan ang suspek samtang nagaluto naman ang biktima sang natabo ang komprontasyon kag hinali na lang nga ginlabo sang suspek ang biktima gamit ang binangon.
Naigu-an sa natuo nga bahin sang li-og ang biktima apang nakabato ini rason nga napilasan niya man ang tuo nga kamot sang suspek.
Ginkilala ang suspek nga si Raul Perialdo, 53-anyos, may live-in partner kag residente sang Purok 3, Brgy. Culipapa, Hinoba-an kag ang biktima amo naman si Tongtong Rodriguez, single, mangunguma kag residente man sang nasambit nga lugar.
Gindala ang duha sa Eleuterio Decena Memorial Hospital agud mapabulong ang mga naangkon nga pilas.*
