BACOLOD – Ginluthang patay ang isa ka 29-anyos nga lalaki sa Purok Nangka, Barangay 3, syudad sang Bacolod sini lang nga gab-i sang Domingo, Setyembre 18, 2022.
Nasapwan nga wala na sang kabuhi samtang nagahapa sa higad sang dalan si Raymund Apilledo nga naga-buy and sell sang cellphone kag residente sang Purok Tilapia sa nasambit nga syudad.
Sa interview sang Radyo Bandera sa live-in partner sang biktima, takna las 8:00 sang gab-i, nagtawag ang lalaki nga ginkilala kay alyas “Klintoy” kay Apilledo kag hinali na lamang ini naghalin sa ila nga balay.
Suno kay P/Lt. Jonito Pastrana Deputy Station Commander sang Police Station 2, gina-alegar nga ginsugat ni Klintoy si Apilledo sa ila nga balay sakay sang motorsiklo kag pag-abot sa Purok Nangka, nagbaisanay ang duha kag didto na may nabatian sang asud-asud nga paglupok sang pusil.
Sa inisyal nga imbestigasyon sang kapulisan, gina-alegar nga 9mm ang gingamit nga luthang armas bangud sa natukiban nga 21 nga basiyo sang bala kag tatlo ka bilog nga slug sa ginluntaran sang insidente.
Nahibaluan nga si Apilledo ang may record sang pangpangawat kag imboldado sa iligal nga droga.
Posible nga ginset-up kag ginplanuhan ang pagpatay kay Apilledo sang isa ka wala pa nakilal-an nga grupo.
Wala pa man natumod sang kapulisan ang motibo sa krimen.
Nagapatigayon pa sang imbestigasyon ang mga kapulisan agud mahibaluan ang identity sang mga suspek.
