(Warning: graphic content)
HIMAMAYLAN CITY – Nakilala na ang mga suspetsado sa pagluthang-patay sa isa ka lalaki sa Sitio Jalandoon, Brgy. Carabalan, siudad sang Himamaylan sini lamang nga hapon sang Miyerkules, Abril 19.
Ginkilala ang isa sa mga suspek sa kay Dandy Salvador, 36-anyos nga residente sang Sitio Bulod sa nasambit nga barangay, kag may una na ini nga mga kaso sang ‘murder’ kag ‘attempted murder.’
Samtang ang isa amo si Jun Jun Balsimo, yara man sa ligal nga pang-edaron, kag residente sang Sitio Cantupa, Brgy. Buenavista, sa nasambit man nga siudad.
Base sa report sang Himamaylan City Police Station, nagluntad ang pagpangluthang takna las-3:30 sang hapon samtang nagalakat sa plaza ang biktima nga si Regie Soledad, 36-anyos nga residente sang Cunalom sa Brgy. Carabalan, upod ang iya pamilya.
Hinali nga ginpalapitan ang biktima kag ginluthang sang mga suspek kun diin naigo ang biktima sa ulo, likod, kag iban pa nga bahin sang lawas.
Gilayon nga nagpalagyo ang mga suspek padulong sa Sitio Tapol sa nasambit nga barangay.
Gindala pa ang biktima sa Gov. Valeriano M. Gatuslao Memorial Hospital apang gindeklarar ini nga dead-on-arrival.
Narekober sa lugar sang insidente ang isa ka bala sang kalibre 9mm, isa ka basiyo sang bala kalibre 9mm, duha ka bala sang kalibre .45, kag isa man ka basiyo sang bala sang kalibre .45. Nagapadayon pa ang imbestigasyon sang kapulisan agud matumod ang motibo sang mga suspek sa pagpangluthang.
