Patay ang isa ka lalaki matapos ginluthang sa iya balay sa Sitio Huebesan, Brgy. Marcelo, sa banwa sang Calatrava las singko sang kaagahon sini nga Biyernes, Agosto 12.
Ginkilala ang biktima nga si Renato “Retchie” Estrebillo, 43-anyos nga residente sang nasambit nga lugar.
Base sa report sang Calatrava Municipal Police Station, ginkadtoan ang balay sang biktima sang ginabulubanta lima ka mga suspetsado nga nagpakilala nga “military”.
Gintawag sang mga suspek ang biktima, rason kun ngaa ginbuksan sini ang puertahan.
Gindala sang mga suspek ang biktima, ginabulubanta 15 ka metros gikan sa iya balay, antes ginluthang sang makapila ka bes gamit ang wala pa matumod nga armas-luthang.
Nakaagum ang biktima sang pila ka mga igo sa nagkalain-lain nga bahin sang iya lawas nga gintunaan sang iya kamatayon.
Narekober naman sa crime scene ang duha ka basiyo sang bala sang kalibre. 45.
Nahibaluan nga nakasuksok ang mga suspek sang itom nga sweat shirt, itom nga delargo, itom nga kalo, kag itom nga backpack nga may long firearms.
