Nabawian sang kabuhi ang isa ka iloy sa siudad sang Talisay probinsya sang Cebu, matapos nga ginluthang sang iya kaugalingon nga bayaw.
Kalakip man sa nabawian sang kabuhi amo ang anak sang biktima nga makabig man nga hinablos sang suspek.
Antis nagluntad ang trahedya, akig na nga ginapangita sang 39 anyos nga suspek ang iya nadula nga dumbbells.
Pagkatapos sini, nagsulod na sa ila puluy-an ang suspek kag ginpalupok ang iya 38 nga revolver.
Bangud wala pa makontento, nagsulod pa gid sa puluy-an sang iya bayaw ang suspek kag ginluthang sa dughan ang biktima nga si Hilda Fernandez.
Nakaangkon man sang igo sang bala ang anak ni Hilda nga si Gilbert kag pareho nga nabawian sang kabuhi.
Nakaangkon man sang igo sang bala sa likod ang isa pa ka biktima nga si Irene Fernandez, nga nagapanglaba sang magluntad ang insidente.
Saksi pa sa natabu nga pagpangluthang ang apat ka mga apo ni Hilda, nga naga edad pa lamang sang apat tubtub pito ka tuig.
Suno sa utod sang suspek nga si Honorato Fernandez, sunod sunod nga napiyerdi sa bulang ang iya utod, nga posible nakapabag-o man sang ugali sang suspetsado.
Isa ka anay criminology instructor ang suspek nga si Rogelio Fernandez, apang karon nagatrabaho bilang isa ka delivery rider.
Ginkumpirmar ni Police Corporal Christopher Lerio, imbestigador sang Talisay City Police Station, nga nag surrender na ang suspek kag yara na sa prisohan.*
