Patay ang duha ka mga kabataan nga naga edad pa lamang sang duha ka tuig kag apat ka tuig, matapos nga ginlabu sang ila kaugalingon nga himata sa probinsya sang Saranggani.
Suno sa kapulisan, una nga ginlabu sang suspek nga si Dewi Pondong, 30 anyos, ang iya kaugalingon nga anak nga lalaki, nga hingadlan lamang nga si Botyok sa sulod mismo sang puluy-an sang iya pakaisa nga si Boy Pondong.
Ginlabu man ni Dewi ang iya hinablos nga babaye nga si Ariana nga naga edad pa lamang sang apat ka tuig.
Matapos nga nagkatumba ang mga kabataan, nagpalapit pa gid ang suspek sa asawa sang iya pakaisa nga si Rose Ann Pondong kag ginlabu ang biktima.
Kalakip man sa nadalahig sa pagpangatake amo ang lapsag nga anak ni Rose Ann kag Boy nga naga edad pa lamang sang isa ka semana.
Ginpalayag man sang kapulisan nga nagatiner ang suspek sa puluy-an sang mag-asawa nga sanday Rose Ann kag Boy sa masobra na sa isa ka tuig.
Nahibaluan man nga separado sa iya asawa ang suspek sa sulod na sang duha ka tuig, matapos nga gintuyo sang suspek nga patyon ang iya asawa, pinaagi sa paglaslas sa li-og.
Bangud indi na mapunggan ang suspek nga si Dewi, ginluthang na lamang ini sang iya pakaisa nga si Boy gamit ang homemade shotgun.
Boluntaryo nga nag surrender si Boy sa kapulisan, matapos ang kremin.
Nagatiner ang suspek kag mga biktima sa isa ka “remote” nga barangay sa Glan, probinsya sang Sarangani.
