STA. ROSA, LAGUNA – Love triangle ang ginalantaw nga motibo sang kapulisan sa pag-abduct ukon pagkuha sa isa ka lalaki sa iya balay sa Brgy. Balibago, syudad sang Sta. Rosa, sa Laguna sang Martes, Agosto 23.
Ginkilala ang biktima kay Rojin Perez nga ginkuha sang tatlo ka mga armado nga lalaki.
Sandig sa report sang Sta. Rosa City Police, nagtawag ang biktima sa iya nobya nga papauli na ini sa ila balay.
Sang naguwa ang nobya sang biktima agud buksan ang gate, nakita sini nga bitbit na si Perez sang tatlo ka lalaki nga may dala sang mga armas-luthang.
Nagpanago naman ang nobya sang biktima tubtob naghalin ang mga suspek nga dala si Perez.
Base sa pahayag sang nobya sang biktima, ginapahog ini sang iya anay bana nga isa ka engineer kag nagpakuha pa ini sang litrato sang biktima panaagi sa ila man nga anak.
Suno sa kapulisan, ginakabig bilang “person of interest” ang anay bana sang nobya sang biktima.
Ginapatigayon sa gihapon ang imbestigasyon sang kapulisan agud madakup ang mga suspek.
