BACOLOD CITY– Nakuha-an sang ginasuspetsuhan shabu ang 42-anyos nga lalaki nga ginserbehan sang warrant of arrest for service of sentence sa kaso nga attempted homicide sa Purok Kasagingan, Barangay Banago sa siudad sang Bacolod, sadtong Lunes, Marso 13.
Ginkilala ang akusado kay Jake Canonero, wala sang asawa, wala man sang ubra kag residente sang nasambit nga lugar.
Gin-isyu naman ni Judge Gisella Janina Tan sang Municipal Trial Court in Cities, Branch 5 ang arrest warrant for service of sentence ni Canonero sa kaso nga attempted homicide.
Sang ginrikisa si Canonero, narekober sa iya ang isa ka coin purse, pulo ka pakete sang suspected shabu kag P208 nga kwarta.
Nagabug-at naman sang 4.4 ka gramos kag ginabulubanta nagabalor sang Php29,920 ang nakumpiskar nga “shabu”.
Nakahunong karon sa Bacolod City Police Station 3 si Canonero.*
