Pilason nga gindala sa hospital ang isa ka lalaki matapos ginbuno sang tag-iya ka tyanggi alas 4:45 kaina sang hapon, Hulyo 16, sa Brgy. Bi-ao, banwa sang Binalbagan, Negros Occidental.
Ang biktima ginkilala kay Ronel Repura y Garcis, 29-anyos kag residente man sang nasambit nga barangay.
Samtang, ang suspek ginkilala kay Gloria y Panggo, ginabulubanta naga-edad sang 70-anyos.
Base sa imbestigasyon sang kapulisan, padulong ang biktima sa sari-sari store sang suspek agud kuntani magbakal sang “whisky” sang hinali nalang siya nga ginbuno sang suspek gamit ang matalom nga hinganiban.
Nakaangkon sang pilas ang biktima sa idalom sang iya tuo nga likod.
Padayon pa karon ang imbestigasyon sang Binalbagan Police Station sa nagluntad nga insidente kag padayon pa nga ginapangita ang suspek nga si Gloria nga sa karon, “at large”.
