LA CARLOTA CITY – Imbes nga kasadya, kasubo ang nangin resulta sang pag-inom inom kag pagkanta-kanta sang lima ka mag-abyan matapos mapatay ang ila upod sang gina-alegar nakabati sang lupok sang armas-luthang sa Hacienda De Agua, Brgy. Cubay, siudad sang La Carlota kagab-i sang Sabado, Enero 21.
Ginkilala ang biktima nga si Nador Guitguit, 66-anyos, may asawa, kag residente sang nasambit nga hacienda.
Base sa report sang La Carlota City Police Station, naga-inom sang makahulubog nga ilimnon samtang nagakanta ang biktima upod ang apat pa nga mga lalaki sa balay sang ila himata nga malapit sa balay sang suspetsado nga si Romel Maquilat, 39-anyos.
Las syete sang gab-i, ginsaway kag ginsinggitan sang suspek ang grupo sang biktima kag ginmanduan ang mga ini nga mag-untat sa pagkanta.
Nagbalik pa ang suspek takna las otso kag nagreklamo ini nga nagaka-isturbo ini, didto na nagpaguwa ang suspek sang armas-luthang nga iya gintuon sa babaw kag ginpalupok sang maka-apat ka bes.
Bangud sa paglupok nga tuga sang armas-luthang, nakabatyag ang biktima sang pagsakit sa iya dughan kag nabudlayan ini magginhaawa.
Ginhingagaw ini dala sa Don Salvador Benedicto Memorial District Hospital apang gindeklarar ini nga dead-on-arrival.
Gilayon naman nga gindakop si Maquilat sang kapulisan kun diin nang-lock pa anay ini sang iya kuwarto.
Sang magguwa ini, ginpamatukan pa sini ang pagdakop sa iya apang tigayon nga nadakop ini upod ang iya trabahador nga si Jerzon Aduana bangud sa “disobedience.” Yara na sanday Maquilat kag Aduana sa kustodiya sang nasambit nga police station para sa nagakaigo nga disposisyon.
