KABANKALAN CITY – Pilason ang isa ka lalaki matapos ini ginkuha kag ginluthang samtang nagakatulog sa balay sang iya abyan sa Sitio Amian, Brgy. Tampalon, sa syudad sang Kabankalan takna las tres sang kaagahon sang Lunes, Setyembre 19.
Ginkilala ang biktima nga si Jimmy Fermo, 37-anyos nga laborer kag residente sang nasambit nga lugar.
Base sa pahayag sang biktima, ginsulod ini sang apat tubtub anum ka wala pa makilala nga mga suspetsado nga nagasuksok sang mga bonnet.
Dugang pa sang biktima, gingapos kag gintabunan pa ang mga mata sini antes ginkarga sa salakyan.
Naninguha ang biktima nga makapalagyo kag didto na ini ginluthang gamit ang shotgun.
Nakaagum ang biktima sang duha ka igo sa iya nawala nga tiil kag isa sa natuo sini nga paa.
Nahibaluan nga ang biktima ang Top 5 Most Wanted Person sa syudad sang Kabankalan kag Top 7 naman sa probinsya sang Negros Occidental angut sa kaso sini nga murder sang tuig 2021.
Base sa pahayag sang manghod sang biktima, gina-alegar lima ka bes nga nakapatay ang biktima.
Nagapadayon pa ang imbestigasyon sang kapulisan agud makilala ang mga suspek kag mahibaluan ang motibo sa nagluntad nga insidente. Nagapabulong naman ang biktima nga akusado sa Lorenzo Zayco District Hospital kag yara na ini sa kustodiya sang kapulisan para sa nagakaigo nga disposisyon.
