Ginkumpirmar ni Commander Jansen Benjamin, Operation Officer sang Philippine Coast Guard Western Visayas nga ginbawian sang kabuhi ang 43-anyos nga lalaki matapos nga naglumpat sa barko sang Tri-Star, mga 3.1 nautical miles mang kalayuon sa BREDCO Port tinalikdan nga Setyembre 10.
Ang lalaki ang ginkilala kay Enriquito Maguad Jr. nga residente sang Prk. Sto. Niño Brgy. Handumanan Bacolod City.
Sa interview sang Radyo Bandera Bacolod, ginpahayag ni Benjamin nga ginrevive pa si Maguad samtang nagapadungka ang barko kag gilayon nga gindala sang Amity sa ospital apang gindeklarar ini nga dead-on-arrival.
Suno pa kay Benjamin, base sa ila impormasyon nga nabaton, sang nahibaluan nga may indibidwal nga naglumpat sa nasambit nga barko, gilayon ini nga nagmanuever kag naghaboy sang life ring ang crew sa tupad sang lalaki apang wala niya ini ginlab-ot.
Bangud sadto, naglumpat nalang ang isa sa mga crew agud salbaron ini kag didto nahibal-an nga nadulaan na siya sang animo.
Ginsiling pa sang commander nga posible depress ang biktima rason nga naglumpat ini.
“Ang mental state niya amo na ang wala ta mabal-an. Basi depress siya, or something”, pahayag ni Benjamin.
Nahibaluan nga ang nasambit nga barko ang may biyahe nga Dumangas-Bacolod.*
