BACOLOD CITY – Ginduso ni Councilor Renecito Novero ang resolusyon nga magahatag sang libre nga school supplies para sa mga estudyante sa Kindergarten tubtob Grade 6 sa regular session sang Sannguniang Panlungsod sang Miyerkules, Hulyo 20.
Suno kay Councilor Novero, tuyo sini nga mapasar ang hagna kag nagahingyo ini sa alkalde, City Accounting, kag Department of Budget nga mapangitaan sang pundo ang nasambit nga resolusyon.
Nagalaum si Novero nga mapamag-an ang obligasyon sang mga ginikanan sa pagbukas liwat sang klase para sa School Year 2022-2023 pinaagi sa pagpasar sang resolusyo kag magamit pa nila ang ila nga kwarta sa iban pa nga importante nga kinahanglanon.
Madumduman nga napatigayon man ang pagpanagtag sang libre nga school supplies sang nagligad nga mga administrasyon kaangay sang termino nanday Monico Puentevella kag Evelio Leonardia.
by Red Salgado
