Apisar sang pagdamu sang kaso sang COVID 19 sa Pilipinas, nagapati ang OCTA Research nga indi na kinahanglan nga pasakaan pa ang COVID alert level sa pungsod okon magpatuman sang “lockdown”.
Suno kay OCTA Research fellow Professor Ranjit Rye, nagsaka ang kaso sang coronavirus disease 19 sa Pilipinas, bangud sang indi pagsunod sang mga Filipino sa health protocols kag ang pagsulod sa pungsod sang mas makalalaton nga Omicron sub variants.
Ginpalayag man ni Rye nga kinahanglan lamang mahibaluan sang mga pumuluyo nga nagadamu na naman ang kaso sang COVID sa pungsod, agud nga maghalong ang publiko kag magsunod sa minimum health standards.
Tubtub sa katapusan sang bulan sang Hunyo, ginpaidalum sa alert level 1 ang National Capital Region kag iban pa nga mga lugar sa Pilipinas.
May mga lugar man sa pungsod nga ginpaidalum sa alert level 2 tubtub sa Hunyo 30.
Samtang, ginpaathag sang OCTA, nga ang nagasaka nga positivity rate kag reproduction number , nagakahulugan nga posible magluntad ang isa na naman ka “COVID 19 surge” sa pungsod.
Apang, ginpalayag sang professor nga wala sang dapat ikabalaka sa liwat nga pagdamu sang kaso, kundi kinahanglan lamang nga mag adjust sa ila pamatasan ang publiko.*
