Gintay-og sang mabaskog nga linog ang siudad sang Khoy sa West Azerbaijan province sa pungsod Iran.
Base sa record sang Seismological Center of the University of Tehran, nagluntad ang 5.9 magnitude nga linog, las 9:44 sang gab-i, Sabado, Enero 28.
Sa nasambit nga kalamidad, duha na ang kumpirmado nga nabawian sang kabuhi samtang 580 naman ang nasamaran.
Nagpadulong pa sa siudad sang Khoy ang mga opisyal sang gobyerno, agud makita ang sitwasyon sang mga residente.
Sang tinalikdan nga Enero 18, nagluntad man sa Khoy city ang 5.8 magnitude nga linog, sa diin ginatos ka mga persona ang nasamaran.
Sang tuig 1990, nagluntad ang 7.4 magnitude nga linog sa Iran kag ginkabig bilang pinakamakamamatay nga linog sa history sang nasambit nga pungsod.
Kapin sa 40,000 ka mga persona ang nagkalamatay sa insidente kag kapin sa 300,000 naman ang nasamaran.*
