Patay ang mag-iloy matapos malunod sa baybayon sang syudad sang Cadiz alas 10 sang aga sini nga adlaw sang Miyerkoles, Marso 3.
Ginkilala ang mga nalumos nga sanday Melanie Alo, 39 anyos kag bata sini nga si Marybeth Alo, 11 anyos, mga residente sang Brgy. Tiglawigan sang nasambit nga syudad.
Sa inisyal nga impormasyon, nagpadulong si Melanie kaupod ang apat ka kabataan agud maligo sa baybay. Duha diri ang iya mga bata kag duha ang iya hinablos.
Suno sa mga himata, naligo ang mga kabataan sa baybay kag sang nakit-an ni Melanie nga nagapangayo sang tabang ang mga bata, gilayon niya nga ginrescue ang mga ini.
Gintinguhaan niya nga luwason ang apat ka kabataan apang napaslawan ini nga salbaron ang iya 11 anyos nga bata nga si Marybeth.
Gilayon nga nangayo sang bulig ang tatlo ka bata nga naluwas ni Melanie apang pag-abot sang iya himata, nasapwan na lamang sila nga wala na sang kabuhi.
Gintinguhaan pa sila nga marevive kag gindala sa ospital apang gindeklarar na ang mag-iloy nga dead on arrival.
with reports from Roel Pineda
