Mag-iloy nga Pilipino, ginpatay sa sulod sang salakyan sa Canada

Ginapangitaan na sang paagi nga makapauli sa Pilipinas ang bangkay sang mag-iloy nga sanday Elvie Sig-od, 44 anyos kag anak sini nga si Angelica.

Ginpatay sa sulod sang salakyan malapit sa Bathurst Street kag Ellerslie Avenue ang mag-iloy.

Pareho nga residente sang Toronto ang mga biktima.

Pinaagi sa GoFundMe page, nagatipon na sang pondo ang grupo nanday Pastor Marvin Dolores sang Lord of Glory International Ministries, agud mapabalik na sa Pilipinas ang mga bangkay.

Suno sa pastor, wala sang himata ang mag-iloy nga magaasikaso sa ila mga bangkay sa Canada.

Ginkilala ang suspek sa kremin nga si Godfrey Sig-od, 46 anyos, nga himata sang biktima.