Patay ang mag-iloy samtang pilason naman ang walo ka tuig nga bata matapos ang mga ini ginpangluthang sa Hda. Ledesma, Barangay Matab-ang, Talisay City, Negros Occidental sini lamang nga gab-i sang Martes, Marso 28.
Sandig sa inisyal nga imbestigasyon, ginkilala ang mga biktima nga sanday Shirley Española, 50-anyos, Jason Española 28-anyos kag ang pito ka tuig nga bata, lunsay mga residente sang nasambit nga lugar.
Suno sa asawa ni Jason nga si Victoria Española, nagdaug si Sherly sang P3,000 sa Small Town Lottery (STL) rason nga nagpadulong ini kaupod ang iya duha ka anak sa banwa agud mangumpra sang ila kinahanglanon sa balay.
Sang papauli na kuntani ang mga biktima nga lunsay mga sakay sang motorsiklo, hinali na lamang ang mga ini ginpangluthang sang wala pa makilal-an nga suspetsado.
Bangud diri, ginbawian ang kabuhi sanday Sherly kag Jason, samtang nakaangkon naman sang igo sa tiyan ang walo ka tuig nga bata rason nga ginhingagaw ini dala sa ospital agud mahatagan sang medikal nga atensyon.
Dugang pa ni Victoria, may nakontra ang iya bana sa ila nga lugar kag napriso pa ini sadto sa kaso nga ‘child abuse’ apang nakaguwa man ini matapos nga mapiyansahan.
Suno naman sa report sang Talisay City Police Station, may narekober sila nga duha ka basiyo sang kalibre .45 kag isa ka slug.
Sa karon padayon pa ang imbestigasyon sang mga kapulisan agud mahibaluan kun sin-o ang suspetsado kag ano ang motibo sini sa pagpangluthang sa mga biktima.*
