BACOLOD CITY– Arestado ang mag live-in partner sa ginpatigayon nga buy-bust operation sang City Drug Enforcement Unit (CDEU) sang Bacolod City Police Office takna las-9:00 sang gab-i, Sabado, Disyembre 3 sa Purok Malipayon, Barangay 35, Bacolod City.
Ginkilala ang mga suspek sanday Jake Jimenez, 41-anyos kag Eliza Mae Dejole, 24-anyos kag temporaryo nga naga-renta sa nasambit nga lugar.
Nakuha sa mga suspek ang napulo ka sachets sang ginapatihan shabu nga nagabug-at sang 26 ka gramo kag nagabalor sang Php176,800.
Sadtong 2015, naka-agi na priso si Jimenez may angut sa iligal nga droga apang na-acquit kag nakaguha sa prisuhan si Jimenez nagligad tuig.
Gin-aku naman ni Jimenez nga nagabaligya kag naga-gamit siya sang iligal nga droga.
Magapangatubang ang duha sa kaso nga paglapas sa Republic Act 9165 ukon Comprehensive Dangerous Drugs Act of 2002.*
