Dakup ang mag live-in partner nga suspetsado sa paglubong-buhi sa ila bag-ong bun-ag nga lapsag sang tinalikdan nga Agosto 21, 2022 sa isa ka patyo sa banwa sang Pulupandan.
Gindakup sanday Julius Ceasar Valdevieso, 23-anyos kag Cristel Haro, 22-anyos nga lunsay mga residente sang Brgy. Patic sa nasambit nga banwa kaina sang aga, Martes, Pebrero 7.
Ginakabig nga Top 1 Most Wanted si Valdevieso samtang Top 2 Most Wanted naman si Haro sa Pulupandan Municipal Level.
Gindakup ang duha sang mga katapo sang Pulupandan Municipal Police Station sa pagpanguna sang ila hepe nga si P/Cpt Emman Anacleto, pinaagi sa warrant of arrest sa kaso nga infanticide.
Gin-isyu ni Judge Mary Jennifer Protasio sang Regional Trial Court, Branch 62 sa syudad sang Bago ang arrest warrant nanday Valdevieso kag Haro.
Wala sang bailbond nga ginrekomendar si Judge Protasio para sa temporaryo nga kahilwayan sang mga akusado.
Madumduman nga buhi pa sang ginpalubong sang mga suspetsado ang lapsag sa patyo kag natukiban nalang nga buhi gali ang bata sang nabatian sang supulturero ang hibi sini sa sulod sang pantyon.
Ginhingagaw dala ang lapsag sa Pulupandan Rural Health Unit kag ginsaylo ini sa Valladolid District Hospital apang makaligad ang pila ka oras, ginbawian ini sang kabuhi.
Sa karon, nakahunong ang mga akusado sa Pulupandan Police Station.*
