Patay na ang isa ka mangunguma sang ini ang makit-an takna las 5:30 kahapon sang kaagahon, Marso 4, 2022 sa Purok 6, Barangay Linao, siyudad sang Kabankalan, Negros Occidental.
Ginkilala ang biktima kay Josue Espuerta, 44-anyos, may asawa, tumandok sang probinsya sang Antique apang temporary nga nakapuyo sa nasambit nga lugar.
Sandig sa inisyal nga pagpang-usisa sang Kabankanlan Police Station, pinaagi kay PCPL Bandola, imbestigador sang kaso, ginapatihan nga gin-atake sang korason ukon “cardiac arrest” ang kabangdanan sa kamatayon sang biktima.
Wala naman sang “signs of struggle” nga nakita ang mga imbestigador sa lugar kun sa diin nakita ang bangkay sang biktima, kag wala naman sang palatandaan nga may “foul play” sa kamatayon sini.
Sa dugang nga pagpang-usisa sang mga imbestigador, nahibaluan nga ang biktima ang isa ka pangayaw sa lugar, naga-ubra bilang karga-tapas halin sa probinsya sang Antique, kag halos anum (6) na ka tuig nga wala na ini makapauli sa iya lugar kag temporary nga nagapuyo sa balay ni Jesus Bacolod.
Dugang pa ni Bandola, pagkatapos sang iya kontrata wala na ini magapauli sa ila lugar.
Gilayon nga gindala ang lawas sang biktima sa Lorenzo D. Zayco District Hospital agud nga madeklarar nga wala na sang kabuhi ang biktima.
Nahibaluan man nga wala na sang komunikasyon ang biktima sa iya kaugalingon nga mga himata.*
by Randy Coronel
