Mangunguma patay sang matabunan sang duta sa Ifugao samtang nagabubo ang ulan nga dala ni Bagyong Henry

Patay ang isa ka mangunguma matapos ini matabunan sang duta sa nagluntad nga landslide sa banwa sang Mayoyao sa probinsya sang Ifugao sini lamang nga Biyernes, Setyembre 2, 2022.

Base sa imbestigasyon, nagkadto ang biktima sa balay sang iya utod kag nagtinir didto sang nagbubo ang mabaskog nga ulan nga tuga sang Bagyong Henry.

Wala na nakaguwa ang biktima sang natiphag ang duta sa lugar.

Bangud sa malain nga tiyempo, na-stranded ang pila ka mga motorista sa banwa sang Bontoc, Mountain Province.

Nagbaha man kag indi na ma-agyan ang karsada sa Barangay Samoki samtang naganilapta ang mga bato kag lutak sa dalan sang Barangay Bontoc Ili sa nasambit nga probinsya bangud sa rockslide kag mudslide.