Patay ang dowa ka lalaki matapos mabunggu-an sang Isuzu Wing Van ang ila ginasakyan nga raider 150 sa Brgy. Camingawan, syudad sang Kabankalan sa atubang sang Hope Baptist Church sadtong Hulyo 7 alas 7:00 sang gab-e.
Ang biktima ang ginkilala sanday Jimel Sumoroy Moya, 22 anyos, backrider, residente sang Brgy. Inapoy; Andy Bonn M. Zapanta, driver sang raider, 24 anyos, residente sang Brgy. Pinaguinpinan syudad sang Kabankalan.
Samtang, ginkilala naman ang driver sang van nga si Antonio Antipatia Jr. y Geocadin, 33 anyos kag residente sang Brgy. Anahaw, Hinigaran.
Sa inisyal nga imbestigasyon, ang Isuzu Wing van ang halin sa Dumaguete City kag magapadulong sa Kabankalan City sang hinali nalang may ginlikawan nga motorsiklo rason nga naglapaw ini sa piyak nga linya nga gin-agyan sang motorsiklo sang mga biktima rason nga nagbunggu-anay ang mga ini.
Bangod sa tuman ka baskog sang impact, nahulog ang dowa ka biktima rason nga nakaagom sila sang patal nga pilas.
Ginhingagaw pa dala ang dowa sa Lorenzo D Zayco District Hospital apang, gindeklarar ang mga ini nga dead on arrival sang attending physician.
Suno sa interview sang News Center kay Cenith Gonzales Buenaflor, pakaisa sang isa sa biktima, ang mga ini ang magagradwar na kuntani sa Central Philippine State University (CPSU), Negros Occidental.
Dugang pa ni Cenith, nga naga-angkasanay ang dowa agud magpabookbind sang ila final requirement kag papauli na kuntani apang sila ang nabunggu-an sang panel van.
Suno pa kay Cenith, nga ang drayber sang panel van ang nadakpan kag ginpaguwa ini sa prisohan makaligad ang 36 ka oras bangod indi pwede e hold apang on going ang pagpasaka sang kaso.
