Patay ang isa ka manug-karo matapos nga ginlabo sang iya man lang kaupod sa trabaho sa Purok Malipayon, Barangay Cabug sa ciudad sang Bacolod.
Ang biktima ang ginkilala kay Allan Cordova, 44-anyos, residente sang Barangay Maao sa ciudad sang Bago, Negros Occidental apang temporaryo ini nga nagapuyo sa Purok Malipayon.
Samtang ang suspetsado naman ang ginkilala kay Rodel Ansag, residente sang Cansalungan sa banwa sang Isabela kag temporaryo man nga nagapuyo sa nasambit nga lugar.
Suno kay Police Lt. Lanie Deriada, officer-in-charge sang Bacolod City Police Station 9, madugay na nga may tema-tema ang duha kag masami nga nagabaisay apang, ginapatung-an lang sila sang ila man mga kaupdanan.
Kagab-i, nabatian sang witness nga si Gabriel Jovines nga nagabaisay si Cordova kag Ansag sa ila nga barracks sang magpauli ang mga ini gikan sa isa ka inom-inom.
Sang ginlili ni Jovines ang ginatulugan sang duha, ang suspek ang may uyat na nga espading samtang nagahamyangon na kag nagapaligo sang kaugalingon nga dugo si Cordova.
Nagguwa man sa imbestigasyon nga pareho nga yara sa impluwensya sang makahulubog nga ilimnon ang duha.
Gilayon naman nga nagpalagyo si Ansag, apang ini ang nagsurender man sa mga utoridad matapos sang pila ka oras nga pagpanago sa sulod sang kampo.
Wala naman mahingagaw dala sa ospital si Cordova kag didto mismo ginbawian sang kabuhi bangud sa madamo nga pilas sa ulo kag butkon nga iya naangkon.*with reports from Jinn Siatita
