Gindakop sang mga kapulisan ang isa ka manug-sarahe matapos nga gin-alegar nagpangawat sang motorsiklo sa ciudad sang Bacolod, subong nga Miyerkules nga adlaw, Marso 10.
Nagreport ang tag-iya sang motorsiklo sa Station 9 matapos nga nakita sini nga nagapundo sa Barangay Mansilingan ang iya gin-alegar ginkawat nga motorsiklo sa ila balay sa Barangay Sum-ag, kaina sang aga, suno kay Police Major Ritchie Gohee, hepe sang Station 9.
Ginpa-verify sang pulis ang reklamo sang tag-iya kag ginpa-updan sa mga operatiba sa area nga nakita sini ang iya ginkawat nga motor kag tigayon nga na-rekober sa Purok Himaya, Barangay Mansilingan.
Sang ginbuksan ang U-box sang motorsiklo, nakita didto ang mga dokumento sang motor nga nakapangalan sa biktima, suno kay Gohee.
Gindakup man ang suspek nga ginkilala kay Jake Ralph Barcenas, 30-anyos, sang Purok Himaya. Siya ang may mga reklamo nga na-record sa Station 7 angut sa pila ka mga kinawatay, apang wala pa mahibal-an kung napasakaan ini sang kaso ukon wala, gindugang pa ni Gohee.
Wala sang yabe ang motorsiklo sang ini ang narekober.
Suno sa biktima, gin-park niya ang iya Motorstar nga motorsiklo sa iya gina-istaran kag nakakas niya man ang yabe.
Ginpanginwala naman ni Barcenas, nga naka-detain sa Station 9, nga ginkawat niya ang motorsiklo kag nagsaad ini nga ginsugo lang siya sang babayi nga bayaw sang biktima nga kuhaon ang motorsiklo.
Nagpanugyan naman ang mga kapulisan nga indi gid maghatag sang kumpyansya bisan may lock pa ang ila mga motorsiklo, kag ipasulod gid ini sa gate agud malikawan nga makawat ini.*
