Nakapauli na ang kapin 118 ka mga Bacolodnon nga Overseas Filipino Workers sa ila tagsa ka mga pamilya matapos nga magnegatibo sa PCR-Test kag matapos man ang ila sini nga 14-diyas nga quarantine.
Ginpatigayon ang graduation day sang mga OFWs sang gintalikdan nga Sabado Hunyo 13 kon sa diin may yara sang apat tanan ka batch ang nagpauli.
Ginpangunahan ni City Councilor Israel Salanga ang paghatag sang certificate sa mga OFWs patimaan sang ila sini nga sakripisyo kag kooperasyon kon sa diin nagresulta sang ila nga pagka hilway sa COVID19.
Nagpasalamat man si Salanga sa katapo sang DRRMO kag mga nars sa ciudad nga amo ang nag-upod sa mga OFWs umpisa nga nag-abot ang mga ini sa ciudad.
Sa piyak nga bahin gindis-infect naman ang mga quarantine facility sang ciudad matapos agud mapasegurado nga malayo sa virus ang mga ini.
Sa karon maayong balita nga makabig bangod wala sang may nagdugang nga kaso sang mga OFWs sa ciudad umpisa kahapon base sa ginpaguwa nga report sang Department Of Health Western Visayas.
Nagapabilin naman nga may yara sang 20 tanan ka mga kompermado nga kaso sang COVID19 sa ciudad sang Bacolod kon sa diin 12 sa mga ini ang naka-recover na kag isa ang naka home quarantine kag apat ang yara sa facility quarantine kag 3 sa mga ini ang nagtaliwan na.
