BACOLOD CITY – Nakakumpiskar sang 1045.875 gramos ukon P7,111,950 nga balor sang shabu ang Bacolod City Police Office sa bilog nga bulan sang Agosto, sini nga tuig 2022.
Sa 40 nga police operations nga ginpatigayon sang BCPO, nakadakup sila sang 46 nga drug personalities, nalakip na ang 33 ka drug pushers kag 13 ka drug users. Suma total 75 ka mga kaso ang napasaka sa korte sa paglapas sang Republic Act 9165 ukon Comprehensive Dangerous Drugs Act of 2002.
Sa kampanya batok wanted nga mga person, nakapatigayon ang BCPO sang 61 ka police operations kun sa diin nakadakup sila sang 14 ka mga Most Wanted Persons kag 48 ka iban pa nga nagapangatubang sang nagkalain-lain nga kaso.
Sa kampanya naman batok loose firearms, nakapatigayon ang kapulisan sang 12 ka mga police operations nga nagresulta sa pagkadakup sang duha ka mga violators kag pagkakumpiskar sang duha ka homemade firearms. Napasakaan naman sang kaso ang duha ka mga nagkaladakpan sa paglapas sang R.A. 10591 ukon Comprehensive Firearms and Ammunition Regulation Act.
Samtang, may apat ka mga homemade firearms nga gin-surrender kag anum ang gin-deposito for safekeeking sa BCPO bilang kabahin sang Oplan Katok nga programa sang Philippine National Police.
Sa kampanya batok iligal nga panahor, nakapatigayon ang BCPO sang 17 ka mga police operations kung diin 66 ang na-aresto kag P32,329 ang pusta nga nakumpiskar.*
