Siyam ka mga persona ang nabawian sang kabuhi sa pungsod Pakistan bangud sang kagat sang lamok kag iban pa nga mga balatian, kahapon Lunes.
Base sa report sang gobyerno, linibo libo ka mga persona ang apektado sang mga nagkalain lain nga balatian matapos nga nagluntad ang lapnagon nga pagbaha sa nasambit nga pungsod.
Nakasaad sa record sang Pakistan government, nga nagsaka sa 318 ang nagkalamatay bangud sang balatian.
Sa karon, amat amat na nga naganubo ang tubig baha apang madamu pa sang mga lugar sa pungsod nga ginatiniran sang tubig.
Kalakip sa mga balatian nga nagaapekto sa mga pumuluyo sa Pakistan, bangud sang wala nagahubas nga tubig baha, amo ang malaria, dengue fever, diarrhea kag mga sakit sa panit nga nag apekto sa mga pumuluyo sa southern Sindh province.
Kahapon lunes, siyam ang nabawian sang kabuhi bangud sang gastroenteritis, acute diarrhea kag suspected malaria.
2.7 milyones na ang kadamuon sang mga indibidwal nga ginpaidalum sa treatment bangud sa balatian humalin sang Hulyo 1.
Suno sa mga opisyal, indi ma kontrol ang pagdamu sang kaso sang diarrhea kag malaria sa mga mobile hospitals sa Pakistan.
Bangud sang wala untat nga ulan, nagbaha sang malawig nga mga binulan sa Pakistan, sa diin 33 milyones ka mga pumuluyo ang naapektuhan.
Bangud sang baha, naanud ang mga puluy-an, nalumos ang mga pananom, naguba ang mga taytay, dalan kag nagkalamatay ang mga kasapatan.
Nagdulot ini sang kahalitan nga nagabalor sang 30 billion dollars.
