Desidido nga magpasaka sang kaso ang 16-anyos nga dalagita nga ginhurikap sang grab/taxi driver sa isa ka viral video nga natabo sa siudad sang Bacolod.
Sa interview sang Radyo Bandera Bacolod kay Police Lieutenant Arlyn Torrendon, pinuno sang Women’s and Children Protection Desk (WCPD), kaina sang aga pormal nga nagpadangat sang reklamo sa kapulisan ang biktima.
Bangud nga ulihi na ini naparekord, indi na mahimo dakpon ang 60-anyos nga suspek bangud naglapse na ang oras nga mahimo ini patigayunan sang hot pursuit operation apang pagapasakaan ini sang kaso nga Acts of Lasciviousness in relation to Republic Act 7610 ukon Special Protection of Children Against Abuse, Exploitation and Discrimination Act.
Dugang pa diri, natumod ang suspek pinaagi sa kooperasyon man sang tag-iya sang grab.
Ginpahanumduman naman sang WCPD head ang tanan nga mga kababainhan, legal man ang pang-edaron ukon menor de edad nga kun magsakay sa taxi, indi magpungko sa front seat, kun mahimo, picturan ang plate number ukon ang salakyan antes maglakat kag kun may malabyan nga police station mahimo man nga iparekord nga nagpadul-ong ka sa isa ka lugar sakay sa imo gintumod nga taxi agud nga malikawan ang nasambit nga insidente.
Ginpahayag pa sini nga likawan man ang ‘victim blaming’ bangud makadugang lamang ini sa problema kag trauma nga ginadala sang biktima.
Suno sa iya indi buot silingon nga manubo nga panapton ang suksukon sang isa ka babayi mahimo na ini nga abusuhon.*
