Ginpaandaman ang mga Pilipino sa Singapore batuk sa bag-o nga online scam nga isa ka sahi sang “phishing scam” pinaagi sa short message service ukon SMS.
Suno sa embahada sang Pilipinas sa Singapore, target sang scammers nga makuha ang “Singpass login credentials” sang account holders.
Sandig sa singpass.gov.sg, ang Singpass amo ang isa ka digital identity service sa Singapore kun diin pwede ma-access sang user ang government data sources kag iban pa nga mga pampubliko kag pribado nga serbisyo sang Singapore.
Naghatag man sang abiso ang Singapore Police Force ukon SPF sa pagtaas sang kaso sang mga nabiktima sang nasambit nga online scam.
Sa abiso sang SPF, estilo sang scammer nga magpadala pinaagi sa SMS sang ID nga kaangay sa Singpass sa biktima kun diin ginasiling nga ma-deactivate ang iya nga account.
Bangud diri, kinahanglan sang biktima nga magpatigayon sang facial verification pinaagi sa pag-login gamit ang iya nga ID kag password sa peke nga Singpass web page.
Matukiban lamang sang biktima nga na-scam na siya kun ini ang makabaton sang abiso halin sa Singpass nga na-update na ang iya nga profile ukon nag-sign up na siya sa iya bank account kag credit cards.
Ginpahanumdom sang Embaha ang mga Pilipino sa Singapore nga sundon ang abiso sang SPF kag GovTech kag mangin alerto agud malikawan ang mga online scams.
via ABS-CBN
