CANLAON CITY– Arestado ang ginakabig nga most wanted nga miyembro sang NPA sa ginpatigayon sang joint law enforcement operation sang 62nd Infantry “Unifier” Battalion kag Canlaon City Police Station sa siudad sang Canlaon.
Ginkilala ang NPA member nga si Jerry Montefalcon alias “Bulhot”, 49-anyos, may asawa, miyembro sang Central Negros 1 sa Sitio Anatuling, Barangay Budlasan sa nasambit nga siudad.
Si Bulhot ang nagapangatubang sang madamo nga warrant of arrest nga gin-isyu sang Guihulngan City, Negros Oriental Regional Trial Court Branch 64 sa kaso nga murder sadtong Hulyo 7, 2022 nga wala sang bail bond nga gin-rekomendar ang korte.
Dugang pa, sadtong Mayo 5, 2022, nakabaton man sang warrant of arrest si Bulhot may angut sa kaso nga paglapas sa Republic Act 10591 kag Presidential Decree 1866.
Imbolbado man si Bulhot sa harassments kag liquidations sang CAFGU Active Auxiliary kag mga sibilyan sa Moises Padilla kag La Carlota sa Negros Occidental kag Guihulngan kag Canlaon sa Negros Oriental.*
