MOISES PADILLA – Nadakpan ang isa ka ginakabig nga ‘most wanted person’ sang kapulisan sa ginpatigayon nga manhunt operation sa Brgy. Montilla sa banwa sang Moises Padilla takna las 12:50 sang tungang gab-i sini lamang nga Huwebes, Enero 19.
Ginkilala ang akusado nga si Mel Francis Bernaldez, 37-anyos, may asawa, civilian guard, kag residente sang nasambit nga barangay.
Base sa report sang Moises Padilla Municipal Police Station (MPS), gindakop ang akusado sang ila kapulisan pinaagi sa warrant of arrest sa mga kaso nga “murder” kag “serious physical injury”.
Wala sang may ginarekomendar nga piyansa para sa kaso sini nga murder samtang P3,000 naman ang piyansa para sa kaso nga serious physical injury.
Yara na ang akusado sa kustodiya sang Moises Padilla MPS para sa nagakaigo nga disposisyon.
