BACOLOD CITY – Patay na sang masapwan ang isa ka myembro sang LGBT+ Community sa atubang sang dako nga balay sa bahin sang Purok Alice, Brgy. Singcang-Airport, sa syudad sang Bacolod kaina sang kaagahon sini nga Huwebes, Agosto 4.
Ginkilala sang iloy ang biktima nga si Reynold Apuhin, legal ang pang-edaron, residente sang Purok Sampaguita 2, kag assistant secretary sang nasambit nga barangay.
Nasal-an pa sang residente sang nasambit nga balay nga hubog sang makita ang biktima takna las dos sang kaagahon.
Apang sang nagreponde ang kapulisan, nadiskubrehan nga may mga igo sang buno sa dughan kag liog ang biktima.
Nakita sa CCTV footage nga may ginlagas ang biktima nga duha ka mga persona nga naka-hood takna la una sang kaagahon.
Suno kay PMAJ Joery Puerto sang Bacolod City Police Office-Station 8, ginapangita nila ang lalaki nga karelasyon sang biktima nga ginalantaw bilang person of interest kun diin posible nga nahibaluan sang biktima nga may iban ini nga karelasyon.
Suno sa iloy sang biktima, wala sang kontra ang iya bata kag amo pa ini ang nagagasto sa ila nga pamilya pati na sa dialysis sang iya ginikanan.
Indi man mabaton sang iloy ang kamatayon sang biktima ilabi na nga brutal ang pamaagi sang pagpatay.
