Nadugangan pa gid ang kadamuon sang mga nagkalamatay sa Sichuan province sa pungsod China bangud sang mabaskog nga linog kahapon, lunes.
Base sa record, 65 na ang nabawian sang kabuhi kag masobra sa 200 ka mga persona ang nasamaran.
Nabatyagan ang 6.8 magnitude nga linog sa Luding County sa Ganzi Tibetan Autonomous Prefecture las 12:52 sang hapon, kahapon kag may kadalumon nga 16 kilometros.
Gintumod ang epicenter sang linog sa 226 kilometros gikan sa Chengdu nga capital city sang Sichuan province.
Gingamit na sang gobyerno ang mga helicopters kag gin deploy ang masobra sa 6,500 ka mga rescuers.
Gin evacuate na ang masobra sa 50,000 ka mga persona sa Ganzi subong man sa siudad sang Ya’an.
Base sa report, masami nga ginatay-og sang linog ang Sichuan nga karon ginpaidalum sa lockdown bangud sang COVID 19.
Sang tuig 2008, naapektuhan man sang mabaskog nga linog ang kapin sa 87,000 ka mga persona sa diin madamu man ang nagkalamatay kag gindeklarar missing.
Nagkalaguba ang mga school buildings kag madamu sang mga pupils ang nahalitan sa nasambit nga trahedya.
