Nagguwa sa imbestigasyon sang Bureau of Fire Protection (BFP) nga ang nagapanguna nga gintunaan sang sunog nga nagluntad sa Manila Central Post Office Building sa Liwasang Bonifacio, Maynila ang naglupok nga baterya sang salakyan sa lower ground sang building.
Sa report sang News5, ang hinali nga pag self-discharge sang baterya sang salakyan ukon sulfation ang ginhalinan sang sunog sa Manila Central Post Office sadtong tinalikdan nga bulan nga nagresulta sa thermal run-away kag nagtuga sang gilayon nga pagsaka sang init, presyon, kag paglupok.
Base man sa nakuha nga fire clearance certificate sang Philippine Postal Corporation (PHLPost) nga gin-isyu sang BFP, ginasiling nga naghalin ang sunog sa southern part sang basement, partikular na sa Mega Manila Storage Room (GSS) kun sa diin yara ang office supplies, thinners, pintura kag mga lata malapit sa mga baterya sang salakyan nga yara man sa sulod sang storage room.
“We welcomed the result of the investigation from the BFP to know exactly what really happened. We will now move on and concentrate primarily on the recovery and rehabilitation of the iconic building” pahayag ni Postmaster General Luis Carlos.*
