BACOLOD CITY – Ginsaysay sang pump boy sa Radyo Bandera ang insidente kung diin may isa ka nagpatughong sang gasolina nga naglakat lang kag wala makabayad sa isa ka gasolinahan sa Barangay Villamonte, Bacolod City, tinalikdan nga Sabado, Setyembre 10.
Pasado las 11 sang aga Sabado sang may nagpagasolina nga Montero Sports nga nagaduag Maroon sa gasolinahan nga nahamtang sa Barangay Villamonte.
Ginbuksan sang drayber ang pwertahan kag naghambal 20 liters, suno sa pump boy.
Matapos matughungan, naghambal ang drayber nga card lang ang iya pagagamiton.
Ginhambalan naman sang pump boy ang drayber nga wala sila sang swipe kag cash lang gid ang ila ginabaton. Naghambal ang drayber sa pump boy nga balikan lang kay wala siya sang cash.
“Ti hambal ko indi na pwede sir kay kami na mamayad kag maakigan kami na sang amon boss,” suno sa pump boy.
Ginsabat siya sang drayber nga, “Ti wala ko may mahimo kay wala ko cash, makadto pa ko da sa balay sang migo ko kay manukot ko kay may utang pa siya sakon.”
Ginpamangkot sang pumpboy kung diin ang balay sang iya migo kag nagsabat ang drayber nga sa Villa Angela.
Gindugang pa sang drayber nga pangayaw lang siya kag nagtanyag nga ibilin niya na lang ang cooler nga nagabalor man masobra P2,000.
Ginsabat sang pump boy ang drayber nga “Indi na pwede sir kay i-deposit na ang kwarta sa bangko.”
Ginbuksan sang drayber ang pwertahan kag nagtinguha nga maglakat apang sige man ang pag-upod sang pump boy, nga nag-ayo sa iya upod nga picturan ang plate number.
Suno pa sa pump boy, medyo gintiklod siya sang drayber para makalakat dayon.
Sang nag-out na ini sang ugto, nagpa-upod ini sa iya upod agud nga magpa-blotter.
Nagbalik sa gasoline station ang pump boy agud idul-ong ang iya upod kag papauli na sang makita ang Maroon nga salakyan sa bahin sang Trinity, nag-give way pa ini apang sang makita ang plate number, iya natalupangdan nga pareho ini sa plate number sang salakyan nga wala nagbayad kag wala nagbalik sa gasoline station.
Ginsunod sang pump boy ang salakyan kag nag-contact sa iya upod, nga nagdali man pakadto sa Lopues East.
Naabtan nila ang salakyan sa atubang sang PNB kung diin gin sirbatuhan nila ini kag nagbulig man ang mga tricycle sa pag-block sa salakyan.
Nanaug sa motor ang pump boy kag ginkadtuan ang drayber. Ginsukmatan niya ini ngaa wala niya ginbayran ang iya ginpatughong.
Nag-video ang upod sang pump boy kag naghambal pa ang drayber nga “Kadtuan ko anay ang migo ko.”
Naghatag man ang drayber sang P1,500. Apang suno sa pump boy, kulang ini sang P20 bangud ang total nga ginpatughong sini ang nagdangat P1,520 apang okay na lang.
First time ini nga natabo sa gasolinahan suno sa pump boy.*
