Ginkumpirmar ni Atty. Renoir Baldovino ang operasyon sang iligal nga Small Town Lottery (STL) sa Negros Occidental kun sa diin ini ang may outlet sa banwa sang Binalbagan kag siyudad sang Sipalay.
Ginklaro ni Baldovino nga sandig sa ila pag-verify sa Philippine Charity Sweepstakes Office (PCSO) nagaisahanon gid lamang ang Super Lucky Beagler, Inc. (SLBI) nga ginhatagan sang permiso sang nasambit nga ahensya nga maga operate sang STL sa bilog nga probinsya kag siyudad sang Bacolod, kun may iban pa nga naga operate, makabig ang mga ini nga iligal.
Suno kay Baldovino sadtong Agosto 6 may nabaton sila nga report nga may naga operate sang STL sa banwa sang Binalbagan kag Sipalay City sa idalom sang pangalan nga Vikings Peryahan ng Bayan rason nga nagpatigayon gilayon sila sang “Surveillance” kag “Test Bet”.
Dugang pa ni Baldovino matapos makumpirmar nga nagapataya sang STL ang Viking Peryahan ng Bayan gilayon sila nga nagapatigayon sang “Surveillance” sa mga outlet sa Viking sa banwa sang Binalbagan kag Sipalay.
Ginpahayag pa ni Baldovino nga may mga ginauyatan sila nga mga ebidensya kasubong sang STL ticket, picture kag video nga nagapamatuod nga nagapataya sang STL ang Vikings.
Kahapon, adlaw nga Miyerkules, Agosto 10, 2022 nagapatigayon sang operasyon ang NBI batok sa duha ka mga outlet sang Vikings Peryahan ng Bayan ugaling wala sila sang may naabtan bangud nagsirado ang duha ka outlet antis mag-abot ang mga operatiba.
Ginpahayag naman ni Baldovino nga magapatigayon pa sila sang madalom nga imbestigasyon batok sa operasyon sang Vikings.
Kag bangud nga kilala na sang NBI ang tag-iya sang duta ukon building nga ginapahamtangan sang duha ka outlet sa separado nga lugar, iga-subpoena sang NBI ang mga tag-iya sang building agud makapag explain kun ngaa ginapahanugotan sang mga ini nga maga operate sa ila nga building ang iligal nga STL.
Nagapati naman si Baldovino, nga maabot ang adlaw nga magabukas liwat ang mga outlet sang Vikings Peryahan ng Bayan.*
