Padayon sa gihapon ang pagmonitor sang Negros Occidental Police Provincial Office sa mga miyembro sang Divinagracia Drug Group nga padayon man nga naga operate sang iligal nga druga sa probinsiya.
Suno kay Lt. Abegael Donasco, spokesperson sang NOCPPO, nga apisar may yara na sang kompirmasyon nga patay na ang lider sang grupo, madamo sa gihapon sang mga downline si Michael Divinagracia nga mahimo magpadayon sa operasyon sang grupo kag ini sila ang karon ginatingwaan nga malab-ot kag madakop sang kapulisan.
Indi man maka komento si Donasco kun bala sa Negros ang destinasyon sang 10 ka kilo nga iligal nga druga nga na rekober sang Muntinlupa Police Station kag Philippine Drug Enforcement Agency sa duwa ka miyembro sang Divinagracia Drug Group nga napatay sa nasambit nga police operation matapos nga nagbato sa mga operatiba sang tinalikdan nga Domingo sa Muntinlupa City. Wala pa man sang impormasyon si Donasco kun san-o maga abot ang bangkay ni Divinagracia sa probinsiya kag ila pa man gina hulat ang medico legal kag autopsy report agud may yara sila sang scientific kag official confirmation sa identity sini.*
