BACOLOD CITY – Arestado sang Murcia Police Station ang notorious nga kawatan nga suspek sa pagluthang-patay sa ginaalegar isa ka rugby boy sa Brgy. Singcang-Airport tinalikdan nga Hunyo 22 sa Brgy. Amayco, banwa sang Murcia, Negros Occidental kahapon sang hapon, Martes, Setyembre 6.
Sa interview sang Radyo Bandera Bacolod kay Police Captain Marc Joeil Reclamado, hepe sang Murcia Police, natultulan nila ang ginahamtangan sang suspek nga si Jared Delacruz alyas “Jong-Jong”, matapos nagpangayo sang bulig sa kapulisan ang tiya sini nga iya man ginkawatan agud marekober ang mga items nga ginpangkuha sini.
Sang ginverify sang mga otoridad, nahibaluan nga may yara ini sang warrant of arrest sa kaso nga Homicide sa Bacolod Police Station 8 sa pagpatay sa ginaalegar rugby boy sa Purok Gaisano sa siudad sang Bacolod.
Suno kay Reclamado, gin-ako mismo ni Jhong-Jhong nga siya ang nagtiro sa biktima gamit ‘pin gun’.
Dugang pa sini nga ang nasambit nga suspek ang bantog nga kawatan kag isa man sa mga rugby boy diri sa siudad.
Yara na karon sa kustodiya sang Police Station 8 si Jhong-Jhong matapos nga ginturn-over sang Mucia Police kahapon sang hapon.
Suno kay P/Major Joery Puerto, hepe sang Station 8, makabig na nga “case closed” ang kaso sa pagpatay sa rugby boy.*
