Dakop ang 34 anyos nga lalaki nga ginakabig notorious snatcher matapos makastiguhan kag madakpan sang mga bystander malapit sa entrance sang isa ka mall sa syudad sang Bacolod sini lamang nga adlaw sang Lunes, Hunyo 28.
Nakilal-an ang suspek nga si Benjie Caagoy, isa ka construction worker sa Villa Angela, Brgy. Villamonte.
Suno sa inisyal nga imbestigasyon, nagasakay sa depasahero nga jeep ang biktima nga si Kye Baravio, 23 anyos sang Brgy. Estefania, sang ginkuha sang suspek ang wallet sang biktima sa iya blazer.
Sang maghambal na ang biktima nga manaog na siya malapit sa isa ka mall, hinali na lamang nagdalagan ang suspek. Ginkapkap sang biktima ang iya nga wallet kag natukiban nga wala na ini sa sulod sang iya blazer.
Nagsinggit sang tabang si Baravio kag gilayon man nga nagresponde ang mga tawo sa lugar.
Nadakpan sang mga tawo si Caagoy kag ginkastigo rason nga nakaangkon siya sang pilas sa iya bibig.
Depensa sang suspek, nahulog lang ang wallet sang biktima kag iya lang ini ginkuha.
May unod nga mga IDs kag masobra P1,000 cash ang wallet sang biktima.
Nahibaloan nga indi na ini ang nahauna nga beses nga nadakpan ang suspek bangud sa pagpangawat.
Pahayag ni Police Capt. Paul Vincent Pendon, apisar nga wala pa kaagi preso ang suspek, madamo na ini sang reklamo batok sa iya apang wala lang nagafile sang kaso.
with reports from Randy Coronel
