Ginpaarakan bala kag ginpalukpan granada sang wala pa nakilal-an nga mga suspek ang opisina sang Drug Enforcement Unit sang Northern Police District sa Dagat-dagatan, Caloocan City sang Sabado, Mayo 20.
Sa report sang GMA News, ginpahayag ni Northern Police District Director Police Brigadier General Rogelio Peñones nga nagluntad ang insidente takna las 2 sang kaagahon.
Sandig sa inisyal nga imbestigasyon, yara sa sulod sang opisina ang pila sa mga naka-duty nga pulis sang nagluntad ang insidente.
Wala naman sang nareport nga nasamaran ukon napatay sa pag-atake apang naguba ang pila ka bahin sang opisina, partikular na ang hagdanan sa guwa sini.
Ginpahayag ni Peñones nga tatlo ka mga suspek ang ila ginalantaw nga mga persons of interest.
Pila sa mga nakita nga motibo sang NPD sa insidente amo ang posible nga pagbalos sang pila sa mga nadakpan nga kriminal matapos ang asud-asud nga operasyon batuk sa iligal nga druga kag high-value individuals.
Padayon ang ginapatigayon nga imbestigasyon kag backtracking sang mga pulis agud matumod ang mga posible nga yara sa likod sang insidente.*
