Ginpahayag ni Negros Occidental Governor Eugenio Jose Lacson nga naubos na panagtag sang kapitolyo ang 91 milyones nga cash assistance halin sa National Housing Authority (NHA) para sa mga biktima sang bagyong odette sa paglaslas sini sa probinsya sadtong tinalikdan nga Disyembre 16, 2021.
Pinakaulihi nga nakabaton sang ayuda pinansyal ang banwa sang Cauayan kun sa diin nagdangat sa 19,945,000 ka pesos ang naipanagtag para sa 3,989 nga mga benepisyaryo nga “totally damaged” ang mga puluy-an nga nakabaton sang tig 5,000 ka pesos nga ginpangunahan mismo ni Governor Lacson.
Madumdoman nga Disyembre 29, 2021 pa sang mabaton sang Gobyerno Probinsyal ang nasambit nga cash assistance halin sa NHA ugaling nadelatar ang pagpanagtag sini bangud sa mga kakulangan sang mga dokumento kasubong sang listahan sang mga benepisyaryo tubtob nga nag-abtan sang “election banning”.
Nahibaloan nga nakapanagtag na sang nagliligad nga binulan ang kapitolyo sang roofing materials, food packs, kag ayuda nga nagahalin sa National Treasury.
