ILOILO CITY—Nakuhaan sang CCTV ang natabo nga pag-atake kag pagbuno sang duha ka mga lalaki sa secretary-general sang National Union of People’s Lawyer-Panay sa Barangay Villa Anita, City Proper, Iloilo City, Miyerkules sang gab-i.
Sa kuha sang CTTV sang homeowners association sa lugar, makit-an nga ginalagas sang duha ka lalaki ang biktima nga si si Atty. Angelo Karlo Guillen.
Sang matumba ini, didto na siya ginbuno sa ulo gamit ang screwdriver. Ginkuha naman sang mga suspek ang dala nga gamit sang biktima kag nagsakay ang mga ini sa nagsugat nga motorsiklo.
Suno sa imbestigasyon sang otoridad, ginsundan ang biktima sang mga suspek humalin sang papanaog pa lamang ini sa iya nga salakyan. Nagdalagan naman ang abogado sang makit-an nga may ginahunos ang isa sa mga suspek sa iya nga kilid.
Nakasinggit kag nakapangayo pa sang tabang ang biktima nga nabatian naman sang mga tanod nga naka-duty sa lugar. Sang ini ang ginpadulungan, gilayon nga nalagyo ang mga suspek dala ang bag sang biktima samtang ini ang nagahamyangun sa karsada.
Gilayon naman nga gindala sa ospital ang abogad sang mga nagresponde nga pulis kag Iloilo city emergency responders kag naga-ungot pa sa ulo sini ang gingamit nga screwdriver sang suspek.
Ginkondenar naman sang Bagong Alyansa ng Makabayan-Panay pag-atake sa hanay sang mga abogado nga nagasalbar sa tawhanon nga kinamatarong.
Suno sa grupo, state-sponsored ang nasambit nga krimen kag tinutuyo sini nga pahipuson ang mga nagakontra sa gobyerno.
Nahibaluan nga naga-uyat sang sensitibo nga kaso si Guillen sa diin isa ini sa mga abogado sang mga biktima sa massacre sa Negros Occidental.
Ang iya pinakaulihi nga kaso amo ang maduguon nga pagserve sang search warrant sang mga otoridad sa banwa sang Tapaz sa diin siyam diri ang nagkalamatay sang Disyembre 2020.
Sa karon, padayon pa ang imbestigasyon sang mga otoridad sa posible pagkakila sa mga suspek kag motibo sa krimen.
